ՀՄԱՅՔԻ ԳԱՂՏՆԻՔՆԵՐԸ / 2008 ՆՈՅԵՄԲԵՐ

«Ֆրանսիացիներն ասում են` ամեն կին յուրովի գեղեցիկ է»,- գրում է «Լ'Օրեալ» համաշխարհային գեղարարական ընկերության պրեզիդենտ Մարգարիտա Կարբոնյեն: Ըստ նրա, հնարավոր է պահպանել գրավչությունը նաև առանց գեղարարական միջոցների օգնության: Կարևորը կնոջ ընդհանուր ինքնազգացողությունն է, առողջ կենսակերպը, ճիշտ սնուցումը:

Ահա մի քանիսը մադամ Կարբոնյեի յուրօրինակ բաղադրատոմսերից.

- Նախ և առաջ, փորձեք խուսափել քաղցր, յուղոտ, կծու սննդից, զանազան համեմունքներից:

- Ձեր սննդակարգում ներառեք այնպիսի մթերքներ, որոնք պարունակում են A, B, C վիտամիններ, քանզի դրանք շատ կարևոր դեր են խաղում մաշկի և մաշկագեղձերի գործառույթների կարգավորման, պիգմենտավորման և մազերի աճի հարցում: Հատկապես շատ գործածեք մրգային հյութեր, գազար, խնձոր, դդում, բուսական յուղ, կաղամբ, կիտրոն:

- Կանացի գեղեցկության մեծագույն թշնամիներից մեկը ծխելն է: Մաշկի վրա բացասաբար կարող է ազդել նույնիսկ գտնվելը այնպիսի սենյակում, որտեղ ծխախոտ է օգտագործվել: Շատ հաճախ ծխելը պատճառ է դառնում մաշկի ավելորդ ճարպոտության, սև կետերի ու կորյակների առաջացման, իսկ երբեմն էլ նկատվում է հակառակը` մաշկի խիստ չորություն և կնճիռներ:

- Մաշկի չորությունից այսօր շատ կանայք են բողոքում: Այն կարելի է վերացնել խոնավացնող քսուքների միջոցով, սակայն գոյություն ունեն նաև այլ մեթոդներ, օրինակ` օրվա ընթացքում մինչև 1,5 լիտր հեղուկների գործածումը: Օգտակար է անձրևի ժամանակ կամ դրանից հետո զբոսնելը, իսկ ձմռանը` ձյան ներքո: Լվացվելիս պետք չէ դեմքը լիարժեք չորացնել, այլ միայն թեթևակի հպել սրբիչով: Քսուքը դեմքին քսեք սառը ջրով թրջված տամպոնով:

- Մաշկի վիճակը և դեմքի գույնը մեծապես կախված են այն բանից, թե որքան եք դուք քնում կամ լինում մաքուր օդում: Դա հավասարապես ազդում է նաև մազերի վիճակի վրա:

- Անկախ այն բանից` ձեր մազերը չոր են, թե ճարպոտ, գլխամաշկի մերսումը դրանց համար օգտակար կլինի: Այն բարերար ազդեցություն է ունենում արյան շրջանառության վրա, կարգավորում է քրտնագեղձերի և ճարպագեղձերի աշխատանքը, արագացնում մազերի աճը: Մերսում կարելի է կատարել նաև մատներով, սակայն նախընտրելի է դրա համար հատուկ խոզանակ գործածել: Ամեն գիշեր սանրվելիս աշխատեք գոնե 5 րոպե մերսել գլխամաշկը: Այս պրոցեդուրայի արդյունքում, ի դեպ, մազերը կդառնան ավելի ճկուն և փայլուն:

- Աչքերի վիճակի վրա բացասական ազդեցություն են ունենում քամին, փոշին, պայծառ նեոնային լույսը, ծխախոտի ծուխը: Շենքի ներսում մուգ ակնոց կրել պետք չէ, դրանք անհրաժեշտ են միայն խիստ պայծառ արևի դեպքում:

- Օգտակար է ունքերը սանրել հատուկ խոզանակով` նախ դեպի քիթը, ապա` հակառակ ուղղությամբ: Դա կօգնի պահպանել վերջիններիս փայլուն տեսքը, կխթանի մազերի աճը:

- Ունքերի ձևը շտկելու համար ավելորդ մազերի հեռացումը հարկավոր է անել ունելիով, շատ զգուշորեն, մաշկը ձգած վիճակում:

- Նորաձևության հետևից ընկնելով չպետք է մոռանալ, որ ունքերի ձևից է կախված նաև մարդու հայացքը, դեմքի արտահայտությունը: Օրինակ, երկար աղեղնաձև ունքերը դեմքն ավելի խիստ ու հասուն են դարձնում, իսկ կարճ ունքերը, ընդհակառակն, երիտասարդացնում են այն: Բարձրադիր բարակ ունքերը դեմքին անբնական զարմանքի արտահայտություն կհաղորդեն, իսկ ցածրադիր և լայն ունքերը` զայրացած:

- Պետք է միշտ հիշել, որ ժամանակակից գեղարարական միջոցների նպատակը մեկն է` ընդգծել կնոջ բնական գրավչությունը: Այդ պատճառով լավ է ընտրել մեղմ երանգներ ունեցող սնգույր, ստվերաներկեր, քսուքներ: Ահա թե ինչպիսի հաջորդականությամբ է պետք գործածել գեղարարական միջոցները.

• Սկզբում ճակատի, քթի և կզակի վրա կետերով հպեք տոնային քսուքը, ապա մատների ծայրերով այն հավասարաչափ տարածեք դեմքի մաշկի վրա:

• Աչքերի ներքո առաջացած մուգ շրջանակների կամ մաշկի ցանկացած այլ արատների քողարկման նպատակով կարող եք գործածել հատուկ քողարկող տոնային քսուք կամ մատիտ:

• Այնուհետև կարելի է դեմքը պատել դիմափոշիով, որը պետք է ունենա միևնույն երանգը:

• Որպեսզի աչքերն ավելի մեծ երևան, կարելի է մատիտով երիզել վերին կոպի հիմնային մասը` թարթիչներին հնարավորին չափ մոտ:

• Վառ և մուգ ստվերաներկերը գործածվում են, որպես կանոն, երեկոների ժամանակ: Դրանք հարկավոր է քսել վերին կոպի վրա, ինչպես նաև` ստորին թարթիչների շրջանում:

• Ունքերին ավելի մոտ մասում հարկավոր է ավելի բաց երանգներ ունեցող ստվերաներկեր քսել: Ընդ որում, տարբեր ստվերաներկերը հարկավոր է տարածել այնպես, որ դրանց հաջորդումը մեկը մյուսին հնարավորինս սահուն և աննկատ լինի:

• Ցերեկները սովորաբար գործածվում են բաց ստվերաներկեր` մարմնագույն կամ վարդագույն:

• Թարթիչները սևաներկով պատելիս ավելի լավ է դա անել կրկնակի անգամ, երեկոյան կարելի է քսել նույնիսկ երրորդ շերտը:

• Յուրաքանչյուր շերտը քսելուց առաջ հարկավոր է սպասել, որ նախորդը չորանա, ապա խոզանակով թարթիչները սանրել:

• Ունքերը պետք է ներկել միայն խիստ անհրաժեշտության դեպքում, այն էլ` շատ թույլ, միմիայն բնական գույնն ընդգծելու համար: Այդ նպատակով գոյություն ունեն հատուկ կոնտուրային մատիտներ:

• Ունքերը ներկելուց հետո դրանք հարկավոր է զգուշորեն սանրել:

• Անցնենք սնգույրին: Եթե ձեր մաշկը ճարպոտ է, ավելի լավ է ընտրել դիմափոշի-սնգույր, իսկ եթե նորմալ է կամ չոր, ապա` քսուք-սնգույր:

• Սնգույրի միջոցով հնարավոր է շտկել դեմքի եզրագիծը. այն մասերը, որոնք ուզում եք քողարկել, ներկեք ավելի մուգ երանգ ունեցող սնգույրով, իսկ այն մասերը, որոնք պետք է արտահայտվեն` ավելի բաց:

• Սնգույրը, որպես կանոն, պետք է քսել դեմքի այն հատվածներին, որոնք լավ ինքնազգացողության դեպքում բնականորեն թեթևակի շիկնում են:

• Շուրթերը ներկելուց առաջ հարկավոր է դրանց անհրաժեշտ ձև հաղորդել հատուկ մատիտի օգնությամբ: Ընդ որում, անպայման չէ մատիտը քսել շուրթերի բնական եզրագծով:

• Շրթներկը հարկավոր է քսել շուրթերի կենտրոնից դեպի անկյունները:

• Երեկոյան շրթներկի վրայից կարելի է փայլ քսել: Այն, ի դեպ, կարելի է գործածել նաև առանց շրթներկի:

_____________________________

Աղբյուրը` www.homejungle.km.ru